Орусияда жаран пранк кылганы үчүн блогердин бутун сындырып салды

32 жаштагы орусиялык жаран Виталий Жариков аны мазактоого аракет кылган блогердин бутун сындырып салган. Бул тууралуу орусиялык басылмалар жазышты.

Маалыматка ылайык, Жариков көчөдө кетип бара жатып отургучта отурган эки жигитти байкаган, алардын бири ордунан туруп, анын жолун тосуп электр скутерин ижарага алууга каражат жетишсиз болуп жаткандыгын айтып, акча берип туруусун өтүнгөн.

Алгач Жариков каражат которууга макул болгон, бирок андан кийин бейтааныш адам ага таң калычтуу суроолорду берип жаткандыгын, ал эми экинчи адам аларды видеого тартып жатканын байкап калган. Андан кийин ал провокациянын курмандыгы болдум деп ойлоп маектешин уруп жиберген.

Экинчи соккудан кийин бейтааныш адам жыгылып, бутунун катуу ооруп жаткандыгына нааразы болгон. Өтүп бараткан адамдар "Тез жардам" кызматын чакырышкан, дарыгерлер пранкерди ооруканага алып барып буту сынганын тастыкташкан.

Эми пранкер Жариковду анын акчасын уурдап алып, буту менен тээп жиберген деп көрсөтмө берип жатат. Жариков бул айыптоолорду четке кагууда. Ошол эле учурда пранкер окуянын видеотасмасын өчүрүп салганга үлгүргөн.