"Ок атуучу куралдан жаракат алган". Таласта 18 жаштагы кыздын сөөгү унаадан табылды

Талас облусунда 18 жаштагы кызды өлтүрүп кетишти. Бул тууралуу SUPER.KG порталына Талас ОИИБинин маалымат кызматынан билдиришти.

Маалыматка ылайык, кечээ, 4-июнда болжол менен саат 15:20 чамасында Кара-Буура РИИБинин нɵɵмɵт бɵлүмүнɵ "Тез жардам" кызматынан Жаңы-Жер айылында белгисиз адамдын жансыз денеси табылгандыгы тууралуу билдирүү келип түшкөн.

"Билдирүүнүн негизинде, тергөө ыкчам тобу окуя болгон жерге барган. Окуя Кара-Буура районунун Жаңы-Жер айылында болгон. Ал жерде токтоп турган унаанын ичинен кыздын болжолдуу ок атуучу куралдан алган жаракаты менен жансыз денеси табылган. Кароо жана текшерүү жүргүзүү учурунда, жарандын аты-жөнү аныкталып, ал Кара-Буура районунун Жаңы-Жер айылынын 2003-жылы туулган тургуну экендиги белгилүү болгон. Ал эми табылган унаа айып короо жайына токтотулган.

Аталган факты Кылмыштардын жана жоруктардын бирдиктүү реестрине 130-берене "адам өлтүрүү" менен катталып, сотко чейинки өндүрүш иши башталган. Факты боюнча тиешелүү соттук-медициналык экспертизалар дайындалды.

Учурда сотко чейинки өндүрүш иши боюнча тергɵɵ тобу түзүлүп, кылмыштын бетин ачуу максатында кылмышка тиешелүү адамдарды аныктап, аларды кармоого багытталган тергɵɵ-оперативдик иш-чаралары жүргүзүлүүдɵ. Милиция кызматкерлери тарабынан шектүү жарандарды табуу максатында атайын иш-мерчемдер уюштурулуп, багыттамалар тиешелүү органдарга жөнөтүлдү. Кылмыштын бетин ачууга багытталган тергөө жана иликтөө иштери жүрүп жатат", - деп билдиришти облустук милициядан.