Кара-Суу районунун прокуратурасы кримчөйрө өкүлүнүн ысымы ыйгарылган көчө фактысы боюнча текшерүүлөрдү жүргүздү

Кара-Суу районунун прокуратурасы Ош облусундагы Кара-Суу районуна караштуу Кыргызстан айылындагы Достук көчөсүн кримчөйрө өкүлү Айбек Нарматовдун ысымына алмаштыруу фактысы боюнча текшерүүлөрдү жүргүзүп, тийиштүү тапшырмаларды берди. Бул тууралуу 24-октябрда Башкы прокуратуранын басма сөз кызматынан маалымдашты.

Буга чейин кылмыш чөйрөсүнүн өкүлүнүн ысымын туугандары көчөгө ыйгарып алышып, ага чара көрүлгөнүн 17-октябрда Ош ОИИБинин басма сөз кызматынан билдиришкен эле. Окуя тууралуу: 2013-жылдын 3-мартында 25 чакты жашоочу чогулуш өткөрүп, көчөнүн атын өзгөртүү чечимин кабыл алышкан. 16-августта Кара-Суу районунун Төлөйкөн аймактык кеңешине Кыргызстан айылынын 20 жашоочусунун колу коюлган арыз түшкөн. Арызга кол койгондор өздөрү жашаган көчөгө Айбек Нарматовдун ысымын ыйгаруу сунушун билдиришкен. Арызды караган айылдык кеңештин депутаттары көчөгө аты бериле турган адам боюнча кеңири таанышып чыгуу үчүн маселени кароону башка күнгө жылдырышкан. Бирок 14-октябрда Айбек Нарматовдун туугандары өздөрү жашаган көчөнү аталган жарандын ысымынан атап, даректер жазылган көрнөктөрдү илип алышкан. Кара-Суу райондук прокуратурасы тарабынан териштирүү иштери жүрүп, айыл өкмөтү тарабынан көрнөктөр алынды.