Курбусу менен дарыянын жээгинде сүрөткө түшүп жатып буту тайып кеткен. Ошто сууга агып кеткен 15 жашар кыздын окуясы

Кечээ, 8-июнда Ошто сууга чөгүп кеткен 15 жаштагы кыздын сөөгү табылганы кабарланган.

SUPER.KG порталына Ош ОИИБинин маалымат кызматынан окуянын чоо-жайын билдиришти.

Ага ылайык, 7-июнь күнү саат 18:40 чамасында Кара-Кулжа районунун 16 жаштагы тургуну "102" кызматына чалып, 15 жаштагы курбусу Кара-Кулжа дарыясынын жээгине барып сүрөткө түшүп жатып, кокустуктан буту тайып кетип сууга агып кеткендигин билдирген.

Бул факты Кылмыштардын жана жоруктардын бирдиктүү реестрине катталып, сотко чейинки өндүрүш иши башталган.

"Тергөөдө 15 жаштагы кыз Кара-Кулжа айылында ата-энеси менен жашаганы белгилүү болгон. Ал ошол күнү аталган дарыянын жээгине 16 жаштагы курбусу менен келип сүрөткө түшүп жатып, кокусунан сууга агып кетип каза болгону аныкталган. Кыздын сөөгү издөө учурунда Кара-Кулжа дарыясынан табылган.

Кыздын каза болгон жерине жана жансыз денесине сырттан кароо жүргүзүлдү. Аны менен чогуу жүргөн 16 жаштагы курбу кызы атасы жана балдарды коргоо бөлүмүнүн адисинин катышуусунда сурак берди. Учурда иш пландар түзүлүп, тергөө иши улантылууда", - деп билдиришти облустук милициядан.