Аткарбаса айып пул төлөшөт. Москвада жарандар бет кап жана кол кап кийүүгө милдеттендирилди

Орусиянын Москва шаарында коронавируска байланыштуу бет кап тагынуу жана кол кап кийүү режимин күчтөндүрүү башталат. Бул тууралуу орусиялык жалпыга маалымдоо каражаттарында жазылды.

Андагы маалыматка ылайык, 9-июнда январь айынан бери коронавирустун рекорддук көрсөткүчү катталды. Анда бир сутка ичинде 4124 адамдан коронавирус инфекциясы аныкталган. Бул көрсөткүч менен пандемия башталгандан бери вирус жуктургандардын саны 1 миллион 209 миң 214 болду.

"Бүгүндөн баштап санитардык эрежелерди сактоо талабы күчөтүлөт. Коомдук жайларда, киши көп топтолгон жерде, соода түйүндөрүндө, иш-чараларда жарандар милдеттүү түрдө бет кап тагынып, кол кап кийиши керек. Бет кап жана кол кап режимин сактабагандарга 4 миңден 5 миң рублга чейин айып пул төлөө каралган", - деп айтылат билдирүүдө.