"Келиндин үйүнө кирип барышкан". Баткенде 33 жаштагы аялды тоноп, зордуктап кеткенге шектүүлөр кармалды

Баткенде түн жарымында телефон уурдап, зордуктоого шектелген жарандар кармалды. Бул тууралуу облустук милициядан билдиришти.

Милициянын маалыматына ылайык, 4-июнга караган түнү саат 3:00 чамасында Баткен шаарында 33 жаштагы келиндин жашаган үйүнө белгисиз жарандар бет кап кийип кирип, аны бычак менен коркутуп телефонун тартып алып андан соң зордуктап кетишкен.

"Милиция кызматкерлери тарабынан “Каракчы” жана “Тоноочу” операциялары киргизилип, натыйжада Чоң-Кара айылынын 22 жана 21 жаштагы тургундары Баткен районунун аймагынан кармалган. Шектүүлөр убактылуу кармоочу жайына камакка алынган.

Бул факты Кылмыштардын жана жоруктардын бирдиктүү реестрине 161-беренеси "зордуктоо", 201-беренеси "тоноочулук", 190-беренеси "турак жайга кол тийбестикти бузуу" менен катталып, сотко чейинки өндүрүш иши ачылган.

Ал эми жабырлануучуга тийиштүү экспертиза дайындалып, тонолуп алынган телефон ээсине кайтарылды. Учурда тергөө амалдары жүрүп жатат", - деп билдиришти Баткен ОИИБинин басма сөз кызматынан.