Мыйзамсыз байыды делинип кармалган бажы кызматынын башчысы Нурбек Айтмаматовдун мүлктөрү (сүрөт, видео)

Экономика жана финансы министрлигинин алдындагы Мамлекеттик бажы кызматынын Түштүк-Батыш бажысынын башчысы Нурбек Айтмаматов УКМК тарабынан кармалды.

УКМКнын маалыматына ылайык, Түштүк-Батыш бажысынын башчысы Айтмаматовдун мыйзамсыз байыганы аныкталып, 323-берене ("мыйзамсыз баюу") боюнча кылмыш иши козголуп, сотко чейинки өндүрүш башталган.

"Айтмаматов өзүнүн кызматтык ыйгарым укуктарынан пайдаланып, Түштүк-Батыш бажысындагы товарларды туура эмес декларациялоо үчүн коррупциялык схемаларды, товарлардын "жалган транзити" жана башка уюштуруп, натыйжада олуттуу көмүскө киреше алып турган. Айтмаматов пайда көрүү үчүн мыйзамсыз алынган материалдык көп сандаган кыймылдуу жана кыймылсыз мүлктү алуу менен атап айтканда, болжол менен 4 миллион 500 миң АКШ долларына бааланган 30дан ашык элиталык батир, 1 миллион АКШ долларга бааланган 10дон ашык унаа каражаттары мыйзамдаштырылган. Ошол эле учурда көмүскө кирешенин бир бөлүгү С.К. жана Р.К. курулуш компаниясы аркылуу мыйзамдаштырып, бирок негизги акциялары Айтмаматовго таандык болгон", - деп жазылат маалыматта.

Нурбек Айтмаматов УКМКнын убактылуу кармоочу жайында, тергөө улантылууда.