Юлдуз Усманованын "Каракалпактар ​​өзбектердин чапанынын астында жашайт" деген сөзүнөн улам анын үстүнөн арыз жазылды

Өзбекстанда "Эл Хизматында" гезитинин башкы редактору Султонбек Зиёев ырчы Юлдуз Усманованын "Каракалпактар ​​өзбектердин чапанынын астында жашайт" деген сөзүнөн улам анын үстүнөн арыз жазды. Бул тууралуу коңшу өлкөнүн маалымат каражаттары жазып чыгышты.

Ырчы өткөн жылы жергиликтүү телеканалдардын бирине маек берип жатып, "каракалпактардын жашоосу оңой эмес жана алар ​​өзбектердин чапанынын астында жашайт" деп айткан. Басылманын адвокаты Даврон Тожимуродовдун айтымында, алар Юлдуз Усманованын сөзүн "жалпы элди кемсинтүү" деп эсептешип, каракалпак элинен кечирим сурашын талап кылышууда.

"Биз каракалпак эли үчүн жооптуубуз. Себеби алар биздин бир бөлүгүбүз. Алар татаал шарттарда жашашат, балыктар менен азыктанышат. Алыскы жерлерде боз үйлөрдө жашагандар да бар", - деп билдирген басылманын жетекчиси.

Юлдуз Усманова "өзбек примадоннасы" деген ат менен белгилүү. Ошондой эле чуулгандуу сөздөрдү айтып, күн тартибине чыгып турат.

Өзбекстанда 1,9 миллион каракалпак эли жашайт.