Чүйдө аялдын жансыз денеси табылды. Милиция коомчулуктан аты-жөнүн тактоого жардам сурайт

Чүйдө денесинде зордук-зомбулуктун белгилери бар аялдын жансыз денеси табылды. Бул тууралуу SUPER.KG порталына Чүй ОИИББинин басма сөз кызматынан билдиришти.

Маалыматка ылайык, 16-апрель күнү Жайыл РИИБине денесинде ур-токмоктун белгилери бар 35-40 жаштагы аялдын сөөгү табылгандыгы тууралуу билдирүү келип түшкөн.

Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган.

"Иликтөө иш-чараларынын жүрүшүндө бул кылмышка шектелип, 1975-жылы туулган жаран кармалып камакка алынган. Сотко чейинки өндүрүш ишинин алкагында милиция кызматкерлери жабырлануучунун аты-жөнүн тактоого аракет кылып, болжолдуу анкетасын аныкташкан. Ал буга чейин Кара-Балта шаарында жайгашкан үй-жайсыздардын баш калкалоочу жайына кайрылып жүргөн 1988-жылы туулган Н.Н. болушу мүмкүн", - деп билдиришти облустук милициядан.