Футбол: Тажикстан курамасы дагы кийинки баскычка өтпөй калды

Кечээ, 15-июнда футбол боюнча Тажикстан улуттук курама командасы Дүйнө чемпиондугуна тандап алуу оюнунун алкагында Япониянын Осака шаарында Мьянма курамасы менен кез келип, 4:0 эсебинде жеңишке жетти.

Муну менен алар "F" тайпасында 13 упайы менен Япониядан кийин экинчи орунга жайгашты. Бирок Тажикстан курамасы Дүйнө чемпиондугуна тандап алуу турнирин расмий жыйынтыктады. Тажикстан курамасына кийинки баскычка өтүүгө болгону 4 гол гана жетишсиз болуп калган.

2022-жылдагы Дүйнө чемпиондугуна жолдомо алуу үчүн күрөштү уланта турган 12 команда аныкталды. Алар: Сирия, Австралия, Иран, Сауд Арабиясы, Япония, Бириккен Араб Эмираттары жана Түштүк Корея курама командалары өз тайпаларында жеңүүчү болуп, кийинки тандоо туруна өттү.

Мындан тышкары экинчи айлампанын жыйынтыгы боюнча, экинчи орунду ээлеген беш мыкты команда 2022-жылы өтө турган Дүйнөлүк чемпиондугуна тандоо турунун кийинки баскычына өтүштү. Алар: Оман, Ирак, Вьетнам, Кытай жана Ливан.

Кыргыз улуттук курама командасы Дүйнө чемпиондугуна тандоо турунда "F" тайпасында ойноп, 10 упай менен Япония, Тажикстандан кийин 3-орунду камсыздады.