"Евро-2020": Орусия өз үйүндө Финляндияны жеңип, керектүү делген үч упайды алды (видео)

Бүгүн, 17-июнга караган түнү Орусиянын Санкт-Петербург шаарында "Евро-2020" турниринин "В" тайпасындагы Орусия - Финляндия беттеши өтүп, оюн 1:0 эсебинде үй ээлеринин жеңиши менен аяктады.

Беттештеги жалгыз гол биринчи бөлүктүн аягында жаралды. Анда Орусиянын жарым коргоочусу Алексей Миранчук сол буту менен топту эң алыскы бурчтукка багыттады. Миранчук "Евро-2020" турнириндеги эң алгачкы соккусун голго айланта алганын белгилей кетүү керек.

Мындан тышкары бул күнү "А" тайпасындагы 4 команданын оюну орун алды. Анда Италия курамасы Швейцарияны 3:0 эсебинде жеңип, турнирдин плей-офф баскычына чыкса, Уэльс командасы Баку шаарында Түркияны 2:0 эсебинде жеңди.

Жалпысынан турнирге 24 команда катышып, алар 6 тайпага бөлүнгөн. Тайпалык баскычтын жыйынтыгы боюнча, плей-офф баскычына 16 команда чыгат.