Ошто балдар тарабынан жасалган бейбаштыктын кесепетинен УКМКнын кызматкери каза болду

Кол салуудан улам УКМКнын кызматкери каза болду. Бул тууралуу атайын кызматтын басма сөз кызматынан билдиришти.

Маалыматка караганда, кечээ, 20-июнда топтолгон балдар тарабынан жасалган бейбаштыктын кесепетинен УКМКнын Ош шаардык жана Ош облустук башкы башкармалыгынын ыкчам кызматкери каза болду.

Бул факты Кылмыштардын жана жоруктардын бирдиктүү реестрине 130-беренеси 4-бөлүмү “Бейбаштык менен өлтүрүү” боюнча катталып, аны өлтүрүүгө шектелгендер кармалган.

Маалымат үчүн:

20-июнда саат 06:20 чамасында Ош ШИИБинин нөөмөт бөлүмүнө облустар аралык бириккен клиникалык ооруканасынын дарыгери такси менен ооруканага 20-25 жаш чамасындагы белгисиз жарандын жансыз денеси келип түшкөнү кабарланган.

Тергөө тобу окуя болгон жерге барып маркумдун денесине сырттан кароо жүргүзүп, анда жаракаттар бар экени байкалган. Каза болгон жаран 1997-жылы туулган А.А. экени аныкталган.

Тергөө аракеттеринин жүрүшүндө аталган кылмышка шектүү катары Ош шаарынын 22 жаштагы үч жараны кармалып, убактылуу кармоочу жайына киргизилген.