Ошто уурулук жасап жүргөн кылмыштуу топ кармалды

Ошто уурулук жасап жүргөн кылмыштуу эки топтон турган шектүүлөр кармалды. Бул тууралуу Ош ОИИБинин басма сөз кызматынан билдиришти.

"2021-жылдын 17-май күнү Төө-Моюн айыл аймагынын 1966-жылы туулган тургуну Ш.А. дачасында турган базар баасы 100 миң сомго бааланган темирин белгисиз адамдар уурдап кетишкен. Ал эми 1960-жылы туулган М.А.нын өзүнүн жашаган үйүнүн алдында турган базар баасы 25 миң сом турган трактордун шайманын белгисиз жарандар уурдап кетишкендиги боюнча арыз менен кайрылышкан", - деп жазылат билдирүүдө.

Бул факты боюнча кылмышка шектүү катары Ноокат районунун 19 жаштагы тургуну А.А.Ж., Баткен облусунун Кызыл-Кыя шаарынын 19 жаштагы тургуну А.Э.Б., Ноокат районунун 21 жаштагы тургуну А.К., Баткен облусунун Кызыл-Кыя шаарынын 21 жаштагы тургуну Э.Н., Ноокат районунун 20 жаштагы тургуну Т.Т., Ноокат районунун 21 жаштагы тургуну А.О.Т. кармалды.

Жазык кодексинин 98-беренесинин негизинде, А.А.Ж. жана А.Э.Б. Араван РИИБинин убактылуу кармоочу жайына киргизилди. Ал эми калган кылмышка шектүүлөр үй камагына чыгарылды, учурда тергөө амалдары уланууда.