Оштогу окуу жайда пара алууга шектелип кармалган мугалим үй камагына чыгарылды

Буга чейин студенттерден пара алууга шектелип кармалган Кыргыз улуттук университетинин Ош шаарындагы филиалынын Э.Г. аттуу кызматкери үй камагына чыгарылды. Бул тууралуу SUPER.KG порталына Ош облустук сотунун маалымат катчысы Айпери Туратбек кызы билдирди.

Анын айтымында, аталган кызматкерди жумуштан убактылуу четтетүү боюнча дагы токтом чыккан.

"Чечим чыгарууда сот шектүү аялдын кант диабети менен жабыркап, каттоодо тургандыгын, жалгыз бой эне экендигин жана жашы жете элек балдары бар экенин эске алган. Ал буга чейин камакта болчу, кечээ, 22-июнда үй камагына чыгарылды", - деп билдирди ал.

Эске салсак, Жусуп Баласагын атындагы Кыргыз улуттук университетинин Ош филиалынын айрым кызмат адамдары пара алууга катыштыгы бар экендиги аныкталган.

Бул факты Кылмыштардын жана жоруктардын бирдиктүү реестрине катталып, сотко чейинки өндүрүшкө алынган.

Интернетке мугалимдин акча алып жатканы жашыруун тартылган видео жарыяланган.