"Токио-2020": Айсулуу Тыныбекова Олимпиададагы рейтингде биринчи номурду алды

Кыргыз балбан кызы Айсулуу Тыныбекова быйыл жайында өтө турган "Токио-2020" жайкы Олимпиада оюндарында өз салмак категориясында биринчи номурду алды. Мындай маалымат Дүйнөлүк күрөш уюмунун сайтына жарыяланды.

Олимпиададагы номурларды ар бир салмак категориядан күчтүү делинген 4 балбан алган. Жалпысынан 62 килограмм салмакта Олимпиадада байге үчү 16 спортчу күч сынашат. Анын ичинен эң мыкты 4 балбан 2019-жылдагы Дүйнө чемпиондугу, ошондой эле бир нече рейтингдик турнирлердеги көрсөткүчтөрүнүн жыйынтыгы боюнча түзүлгөн дүйнөлүк рейтингге ылайык тандалган.

Экинчи орунду болгариялык Тайбе Юсеин, үчүнчү орунду украиналык Юлия Остапчук, төртүнчү орунду япониялык Юкако Каваи ээлеген. Олимпиадада бул төрт балбан кыз жарым финалга чейин бири-бири менен беттешпейт.