Чүйдө колониядан качып, издөөдө жүргөн аял кармалды

Чүйдө колониядан качып, издөөдө жүргөн аял кармалды. Бул тууралуу облустук милициядан билдиришти.

Маалыматка ылайык, 28-июнь күнү милиция кызматкерлери тарабынан абактан качкан аял кармалган.

1982-жылы туулган Д.Н. аттуу аял Молдовановка айылындагы №26 абактан жазасын өтөп жатып качып кеткенине байланыштуу февраль айынын аягында издөө жарыяланган. Бүгүнкү күндө аял кармалып, Жазаларды аткаруу кызматына өткөрүп берилди.

"Мындан сырткары милиция кызматкерлери тарабынан жогорудагы аял уурулукка шектелип жатканы аныкталган. Ал жарандардын ишенимине кирип, ар кандай үй буюмдарын уурдап жүргөнү маалым болгон.

Буга байланыштуу сүрөттөгү аялдын кылмыштуу аракетинен жабыркаган жарандарды жакын жердеги ички иштер органдарына кайрылууну суранабыз", - деп билдиришти Чүй ОИИББинин маалымат кызматынан.