Таласта 16 жаштагы кыз өгөй атасынан кош бойлуу болуп калды. Милиция шектүүнү издеп жатат

Таласта 16 жаштагы кыз өгөй атасынан кош бойлуу болуп калган. Бул тууралуу SUPER.KG порталына Талас облустук ички иштер башкармалыгынын басма сөз кызматынан билдиришти.

Милициянын маалыматына ылайык, 22-июнь күнү саат 20:48 чамасында Кара-Буура РИИБинин 102 кызматына Чымгент айылынын 35 жаштагы тургуну чалып, 2005-жылы туулган кызын 50 жаштагы өгөй атасы күч колдонуп зордуктап жүрүп боюнда болуп калганын билдирген.

"Тергөө оперативдик ыкчам тобу окуя болгон жерге барган учурда өгөй атасы качып кетип, жүргөн жери белгисиз болуп жаткандыгы аныкталган. Текшерүү учурунда жабырлануучунун апасы кызынын зордукталганын уккандан кийин ошол замат милиция бөлүмүнө барбай, аймактык милицияга 2-3 күн өткөндөн кийин кайрылганы белгилүү болгон. Зордукталган кыздын апасы шектүү менен өз ара сүйлөшүүлөрдү жүргүзүп, убакыт өтүп кеткендигин билдирген.

Аталган факты Кылмыштардын жана жоруктардын бирдиктүү реестрине 161-беренеси "зордуктоо" менен катталып, сотко чейинки өндүрүшкө алынган.

Кылмыштын бетин ачуу максатында кыздын өгөй атасынын жүргөн жерин тактоо боюнча багыттамалар берилип, соттук-медициналык экспертиза дайындалган. Аны издеп табуу боюнча милиция кызматкерлери тарабынан атайын күч каражаттар жумшалып, ыкчам тергөө амалдары жүргүзүлүүдө", - деп билдиришти Талас ОИИБинин басма сөз кызматынан.