"Кызды көргөндөр милицияга билдирген". Жалал-Абадда дайынсыз болуп жаткан өзбекстандык студент кыз табылды

Буга чейин Жалал-Абадда окуган өзбекстандык 18 жаштагы студент кыз бир жарым айдан бери дайынсыз болуп жатканы кабарланган. Ал аман-эсен табылды. Бул тууралуу облустук милициядан билдиришти.

24-июнь күнү Жалал-Абад ОИИБинин басма сөз кызматы тарабынан Өзбекстандын Шерзод кызы Севинч аттуу жараны дайынсыз болуп жаткандыгы тууралуу маалымат берилген. Анда аталган кыз 3-майдан бери дайынсыз болуп жатканы айтылган.

"Бул маалымат коомчулукка жарыяланган соң кайдыгер эмес жарандар тарабынан кыздын кайда жүргөндүгү тууралуу маалыматтар берилген. Натыйжада дайынсыз болуп жаткан кыз Жалал-Абад ШИИБинин кызматкерлери тарабынан аталган аймактан табылып, чоң энесине өткөрүлүп берилди. Небереси табылганына кубанган чоң эне милиция кызматкерлерине, жалпы кыргыз коомчулугуна ыраазычылыгын айтты", - деп билдиришти облустук милициядан.

Севинч Шерзод кызы Жалал-Абад мамлекеттик университетинин филология факультетинин 1-курсунун студенти.