Бишкекте камакта жаткан жаранды чыгарып беребиз деп 65 миң доллар акча алып, из жашырган шектүүлөр кармалды

Бишкекте алдамчылыкка шектелип эки жаран кармалды. Бул тууралуу Октябрь РИИБинин басма сөз кызматынан билдиришти.

Маалыматка ылайык, окуя ушул жылдын 17-апрелинде болгон. Анда шектүүлөр жабырлануучуга өздөрүн УКМКнын жетекчилигинин ишенимдүү адамдары катары тааныштырып, УКМКнын СИЗОсунда камакта жаткан жакынын чыгарып берүүнү жана анын ишин кыскартып бере ала тургандыгын айтып, 65 миң доллар сурашкан. Андан соң акчаны алып качып кетишкен.

22-июнда жабырлануучу милицияга арыз жазган. Октябрь РИИБинин кызматкерлери көп өтпөй 1998-жылы жана 1997-жылы туулган эки жаранды кармашкан. Алардын баш коргоо чарасы каралып, СИЗО-1ге эки айга камакка алынган.

Милиция кызматкерлери сүрөттөгү жарандардан жабыркагандар болсо, төмөнкү номерлерге чалып коюуну өтүнөт.

Байланыш телефону: 0 (709) 414-941 жана 102.