Ош шаарында коронавируска каршы эмдөө базарларда да жүргүзүлөт

Ош шаарында коронавирус инфекциясына каршы вакцина саюу базарларда да жүргүзүлөт. Бул тууралуу аталган шаардын мэриясынан кабарлашты.

Маалыматка ылайык, 1-июлда Ош шаарынын мэриясында вице-мэр Эмил Шадыханов баштаган Ош шаардык мэриясынын эпидемиясына каршы комиссиясынын отуруму болуп өттү. Жолугушуунун жүрүшүндө коронавирус инфекциясын жана пневмонияны алдын алуу боюнча жүргүзүлүп жаткан иштердин учурдагы абалы каралды.

Учурда дарыкана кампаларында жана соода түйүндөрүндө дары-дармектердин болушу калктын муктаждыктарын канааттандырат. Вице-мэр Шадыханов дары-дармектердин рыногундагы кырдаалды, ошондой эле дары-дармектердин минималдуу запасы кеминде 2 адамга жетиши керектигин эске алуу менен бааларга кылдат талдоо жүргүзүү керектигин белгиледи.

"Жакынкы келечекте биз 110 миң доза коронавирус вакцинасын алабыз деп күтүп жатабыз. Буга байланыштуу калк арасында эмдөөнүн зарылдыгы боюнча түшүндүрүү иштерин күчөтүү керек. Ошондой эле шаардын базарларында жана кичи базарларында ар бир адам вакцина ала турган пункттар ачылат. Тийиштүү кызматтардын жетекчилерине буга чейин уюштуруу иштери менен алектенүү тапшырмасы берилген.

Ошол эле учурда коомдук жайларда санитардык-эпидемиологиялык нормалардын жана эрежелердин сакталышына көзөмөлдү күчөтүшүбүз керек. Негизги басым профилактикалык иштерди жүргүзүүгө бурулуп жатат", - деп баса белгиледи Шадыханов.

Ош шаарында шаардын бардык коомдук тамактануу жайлары, соода жана тейлөө кызматтарынын ортосунда тиешелүү талаптарды так сактоо үчүн түшүндүрүү иштерин жүргүзүү тапшырылды. Мындан тышкары шаардагы ири ишканалардын, мекемелердин жана ведомстволордун жетекчилерине 60 жаштан жогору курактагы кызматкерлерди, кош бойлуу аялдарды жана өнөкөт оорусу бар адамдарды аралыктан иштөөгө жөнөтүү сунушталды. Жарандарды акысыз эмдөөгө байланыштуу шаардык ишканалардын жетекчилерине ишканаларда санитардык-эпидемиологиялык стандарттарга ылайык эмдөөлөрдү уюштурууга көмөктөшүү сунушталды.

Акыркы сутка ичинде Ош шаарында 62 жаңы коронавирус учуру аныкталды.