"Талибан" кыймылы Ооганстандагы бардык чет элдик аскерлердин өз убагында чыгып кетишин талап кылды

Ооганстандын бир нече аймагын толугу менен көзөмөлгө алган "Талибан" кыймылы Ооганстандын аймагындагы чет элдик аскерлердин өз убагында өлкөдөн чыгып кетишин талап кылды. Бул тууралуу "Талибан" кыймылынын өкүлү Сухаил Шахинге таянуу менен чет элдик басылмалар жазды.

"Биз аларга эч кандай коркунуч туудурбайбыз. Алар Ооганстандан белгиленген мөөнөттө чыгып кетиши керек", - деген Шахин.

АКШ күчтөрү жана алардын НАТОдогу өнөктөштөрү Ооганстандан апрель айында кете башташкан. Бул процессти 2021-жылдын 11-сентябрына чейин бүтүрүү пландалууда. Ал эми Улуу Британия Ооганстанда чакан аскер кызматкерлерин калтырууну көздөөдө. Бирок бул боюнча азырынча акыркы чечим жок. Чечимди жакын арада Улуттук коопсуздук кеңешинин жыйынынан кийин Улуу Британиянын премьер-министри Борис Жонсон кабыл алышы керек.