"Калктын 70 пайызы эмделиши керек". Sinopharm вакцинасы аптанын аягында алып келинет

Кытайлык Sinopharm вакцинасы аптанын аягында Кыргыз өлкөсүнө алып келинет. Бул тууралуу министрлер кабинетинин төрагасынын орун басары Жылдыз Бакашова брифингде билдирди.

"Республиканын аймагында коронавирус инфекциясынын жайылышына каршы турууга багытталган иш-чаралардын алкагында ушул аптанын соңунда Кытай Эл Республикасында өндүрүлгөн Sinopharm вакцинасынын 1 миллион 250 миң дозасы келери күтүлүүдө. Анын 1 миллион 100 миң дозасы республикалык бюджеттин эсебинен сатып алынды. 150 миң дозасы Кытай тараптан гранттык негизде берилди.

Азыркы учурда ушул эле вакцинанын дагы 1 миллион 250 миң дозасы үстүбүздөгү жылдын июль айынын аягында кошумча сатып алуу маселеси да каралып жатат. Белгилей кетсем, учурда өлкөнүн калкынын саны 6 миллион 574 миң 361 адамды түзөт. Эмдөө боюнча улуттук планга ылайык, калктын 70 пайызы же 2 миллион 187 миң 417 адам эмделүүгө тийиш", - деп билдирди Бакашова.

Буга чейин Кытай мамлекети коронавируска каршы күрөшүү үчүн Кыргыз өлкөсүнө кайтарымсыз негизде 150 миң доза Sinopharm вакцинасын бергени маалымдалган.