Сарууда сабалган УКМКнын кызматкерлери айылга кудасынан акча алуу үчүн барганын айтышты

Белгилүү болгондой, 28-октябрда Жети-Өгүз районунун Саруу айылында Улуттук коопсуздук мамлекеттик комитетинин 3 кызматкери жергиликтүү тургундар тарабынан сабалып, учурда бирөөсү ооруканада. Окуя саруулуктар район акими менен жолугушуу өткөрүп жаткан учурда болду. УКМКнын балдары Сарууга эмне үчүн барышканын Жети-Өгүз районунун акими Дамир Моңолдоров билдирди.  

"УКМКнын балдары сабалгандан кийин сурадык, Сарууга эмнеге барышканын. Алардын бири айылга кудасынан карызын өндүргөнү эки досун кошуп барганын айтты. Жолдо унаасы бузулуп, уста издеп жүрүп айылдык балдарга жолугуп калыптыр. Жергиликтүү балдар документтерин текшерип, алардын коопсуздук кызматкерлери экенин билгенден кийин токмоктоп салышты",- дейт Моңолдоров.  

Акимдин айтымында, азыркы тапта Саруу айылына чоочун адамдардын кириши кооптуу. Анткени айылдагы жаштар агрессивдүү, ар бир бейтааныш адамга шекшип мамиле жасап жатышат.