Аксыдагы сел: "6 жаштагы баланы издөө иштери уланууда" дейт Жаңы-Жол айыл өкмөтүнүн башчысы

Бүгүн, 13-июлда сел агызып кеткен жайларды тазалоо иштери менен бирге 6 жаштагы баланы издөө иштери уланууда. Бул тууралуу Жаңы-Жол айыл өкмөтүнүн башчысы Эламан Кочкорбаев SUPER.KG порталына билдирди.

"Кечээ ойго келбеген окуя болду. Эки айыл өкмөт үчүн тең оор жоготуу болду. Жаратылыш кырсыгына эч ким туруштук бере албай калат экен. Жаңы-Жол айыл өкмөтүнөн 6 жаштагы бала агып кетип, азыр издөө иштери уланып жатат. Сел агызып кеткен жайларды тазалоо иштери жергиликтүү тургундар тарабынан жүрүүдө. Жайлоодогу тургундарыбызды дагы тактап жатабыз", - дейт Кочкорбаев.

Эске салсак, кечээ, 12-июлда Аксы районунун Жаңы-Жол, Ак-Жол айыл аймактарында сел жүрүп, ӨКМнын берген маалыматы боюнча, 7 адамдын көз жумуп, алардын алтоосунун сөөгү табылгандыгын билдирген. Ал эми SUPER.KG порталына жергиликтүү тургун 9 адамдын каза болгондугун айтып берген.