Кыргыз өлкөсүнө келген Илья Варламов 10 сомдон алган баштыктарды Орусияга алып барып 100 рублдан сатарын айтты

Кыргыз өлкөсүнө келген орусиялык журналист жана блогер Илья Варламов Бишкектен баштыктарды 10 сомдон сатып алганын айтып, кийинчерээк баштыктарды орусиялыктар 100 рублдан алууга даяр экенин айтты. Мындай видеону Варламов Инстаграм баракчасындагы "Stories" бөлүмүнө жарыялады.

"Мыкты сапаттагы баштыктарды алдым. Мындай баштыктар Москвада жок. Мен бул баштыктарды 10 сомдон сатып алдым. Ал эми мага баштыктарды 100 рублдан сатуумду суранып жатышат. Эмнеге Кыргыз өлкөсү бул баштыктарды Орусияга экспорттобойт?", - деди Варламов.

Интернет колдонуучулар Кыргыз өлкөсүндө өндүрүлгөн баштык үчүн ар кандай сумманы сунушташкан.

Илья Варламов Кыргыз өлкөсүнө былтыр, 2020-жылдын сентябрь айында келип кеткен. Анда анын Бишкек шаарындагы Чүй-Манас көчөлөрүнүн кесилишиндеги унаа тыгыны боюнча айтканы кызуу талкууга алынган. Анда ал айдоочулар унаа тыгынына карабай сигналдарын басып жатканын, патрулдук милицияга баш ийбей жаткандыгын айтып таң калган. Мындан тышкары Бишкектин инфраструктурасын кескин сынга алып, бирок жашоочулардын меймандостугу тууралуу оң пикирлерин айткан 1 сааттык видеоберүү даярдаган.