"Табыттарды ачууга уруксат беришкен эмес". Түркмөнстандын Ооганстан менен чектешкен облусунда белгисиз жагдайларда 18 аскер кызматкери каза болду

Түркмөнстанда белгисиз жагдайларда 18 аскер кызматкери каза болду. Мындай маалыматты чет элдик маалымат каражаттары жазышууда.

Андагы маалыматка таяна турган болсок, каза болгон аскер кызматкерлеринин сөөгү жабык болгон табыттарга салынып, туугандарына өткөрүп берилген.

Каза болгон аскерлердин жакындарына алар жол кырсыгынан каза болгондугун айтышкан. Ошондой эле аларды акыркы сапарга узатуу зыйнатына күч структураларынын кызматкерлери келип, аскерлердин сөөгү салынган табыттарды ачууга уруксат беришкен эмес.

"Азаттык" үналгысынын Түркмөнстандагы булактары аскер кызматкерлеринин катышуусундагы жол кырсыгы болгонун тастыктай алышкан эмес. Алардын айтымында, каза болгон аскерлердин сөөгүн Марыйск облусунан КамАЗга жүктөп алып келишкен. Ал эми аталган облуста Ооганстан менен чектешкен чек ара заставасы бар. Буга чейин бул чек ара заставасына Түркмөнстандагы күч структураларынын аскерлерин жана техникаларды тартып жатышкандыгы айтылган. Ал эми Түркмөнстандын Тышкы иштер министрлиги бул маалыматты четке каккан.