Орусиянын Тюмень шаарында жол кырсыгынан каза тапкан 4 мекендешинин өлүмү үчүн Кыргызстандын жараны соттолот

Тюмень облусуна караштуу Ишим районунда Кыргызстандын 23 жаштагы жараны Тынарбек Жакыпбай уулуна карата кылмыш иши боюнча иликтөө аяктады. Бул тууралуу орусиялык маалымат каражаттарына 30-октябрда Тюмень облустук прокуратурасынын басма сөз кызматынан билдиришти. Ага Орусия Федерациясынын Кылмыш-жаза кодексинин 5-бөлүмүнүн 264 беренесине (жол эрежесин бузуунун натыйжасында адамдын ден соолугуна зыян келтирүү менен эки же андан ашык адамдын өлүмүнө себепкер болуу) ылайык кылмыш иши козголгон. Иликтөөнүн натыйжасында Тынарбек Хонда минивен унаасы менен Орусия жана Кыргызстандын ортосунда жүргүнчүлөрдү ташып алектенгени аныкталды. 2013-жылы 9-сентябрда Тюменден 7 адамды унаасына салып Кыргызстанга жөнөгөн. 10-сентябрда Ишим-Безруков унаа жолдорунун кесилишинде Вольво жүк ташуучу унаа менен кагылышып кеткен. Жол кырсыгында 4 адам каза болуп (51 жана 55 жаштагы жубайлар, 33 жаштагы аял жана 22 жаштагы жигит), 18 жаштагы жүргүнчү оор жаракат алган. Унаалардын айдоочулары жабыркашкан эмес. Аталган иш боюнча материалдар кароо үчүн Ишим райондук сотуна жөнөтүлдү.