Режеп Тайип Эрдогандын селден жабыркаган элге чай ыргытканы талкуу жаратты

Социалдык тармактарга Түркиянын президентти Режеп Тайип Эрдогандын селден жабыркаган элге автобустун үстүндө туруп чай ыргытып жаткан видеосу жарыяланып, коомчулуктун кызуу талкуусунда калды.

Айрым түрк басылмалары да өлкө башчысынын бул аракетин сынга алып, суу ташкынынан жабыркаган элге чай зарыл эмес экендигин жазып чыгышкан.

Интернет колдонуучулары "Ризеде үйүн сел алган мекендешибизге бир эле чай жетишпей жатты эле, Кудай ыраазы болсун!", "Муну атайын кылып жатат", "Жадакалса итке да минтип сөөк ыргытпайт", "Чайдын мекени болгон жерде селден жабыркаган элди чогултуп алып чай таркатуу кантип болсун?", "Ризеде сел кетти, ылай калды, президент болсо баягы", "Ишенгим келбейт, итке сөөк ыргыткандай" деген сыяктуу какшык аралаш бир топ пикирлерди калтырышкан.

Белгилей кетсек, 22-июлда Түркиянын түндүк-чыгышында катуу жааган жамгырдан улам сел жүрүп, бир топ айылдарга залакасын тийгизген.