Бостериде түтүк соруп кеткен жигиттин өлүмү боюнча эки берене менен тергөө иштери жүргүзүлүүдө

Ысык-Көл облусунун Бостери айылындагы пансионаттардын бириндеги 18 жаштагы баланын өлүмү боюнча эки берене менен сотко чейинки тергөө иштери жүргүзүлүүдө. Бул туурасында Ысык-Көл облустук ички иштер башкармалыгынын маалымат кызматынан билдиришти.

Маалым болгондой, каргашалуу окуя боюнча тергөө иштери 135-берене ("этиятсыздыктан өлүмгө алып келүү") жана 282-берененин ("керектөөчүлөргө коркунуч жаратуу") негизинде жүргүзүлүүдө.

Кечээ, 27-июлда "Золотые пески" пансионатында аквапарктын түтүкчөсү 18 жаштагы С.С. аттуу жигитти соруп кеткен. Ысык-Көл ОИИБинин маалымат кызматынан каза болгон жигиттин сөөгү өлүкканада экенин, тиешелүү соттук-медициналык экспертизалар дайындалганын кабарлашты.

Ал эми президенттин Ысык-Көл облусундагы ыйгарым укуктуу өкүлү Мирбек Кожоев окуянын тергелишин жеке көзөмөлүнө алды.