ОшТУнун студенттери дүйнөлүк олимпиадада жарым финалга жолдомо алышты

28-октябрда Ош технологиялык университетинин кибернетика жана маалымат технологиялары факультетинин программист адистигинин студенттери программалоо боюнча дүйнөлүк олимпиадага катышышты. Олимпиадага 1-5-курстун студенттеринен түзүлгөн атайын команда катышкан. Жыйынтыгында аталган команда 1-орунду ээлеп, жарым финалга жолдомо алышты. Ал эми олимпиаданын жарым финалы ушул жылдын 1-декабрында Санкт-Петербург, Тбилиси, Барнаул жана Ташкент шаарларында өткөрүлөт. Маалымат катары айтсак, олимпиада интернет аркылуу онлайн түрүндө өткөрүлүп, берилген тапшырмалар интернет түйүнүндөгү атайын программалар аркылуу аткарылды. Бул тууралуу университеттин басма сөз кызматы кабарлайт.