Министрлик: "Төрөтканада каза болгон 18 жаштагы келин аз кандуулук менен жабыркаган"

Буга чейин Ысык-Көл облусунун Каракол шаарында 18 жаштагы келин төрөтканада каза болгону маалым болгон. Ал арада маркумдун жакындары анын өлүмүнө дарыгерлерди айыптап жаткан видео интернетке тараган.

Буга байланыштуу Саламаттыкты сактоо жана социалдык өнүктүрүү министрлиги төмөнкүлөрдү билдирди.

"Ысык-Көл облустук бириктирилген ооруканасынын төрөт бөлүмүндө каза болгон 2003-жылы туулган С.У. Түп районунун тургуну. Ал кош бойлуулугунун 12-аптасында ооруканага каттоого турган. Жеке картанын маалыматына ылайык, ал аз кандуулук менен жабыркап келген.

Ал аталган ооруканага 30-июль күнү толготуп келген. 31-июлда саат 16:50дө көз жарып, бала 2 килограмм 900 грамм салмакта төрөлгөн. Төрөт учурунда келинден кан кетип, төрөтү татаалдаша баштаган. Ал учурда дарыгерлер аны протоколго ылайык дарылашкан. Ага кан куюулуп, көлөмү калыбына келтирилген. Бирок кан кетүү 2 жарым сааттан кийин кайра башталган. Кан кетүүнү токтотуу максатында аны операцияга киргизишкен. Бирок кан кетүү токтогон эмес. Дарыгерлер кеңешип дагы бир операция кылууну чечишкен. Көрүлгөн бардык чараларга карабастан, келин тилекке каршы каза болгон", - деп билдиришти Саламаттыкты сактоо министрлигинин маалымат кызматынан.

SUPER.KG порталына Ысык-Көл ОИИББинин маалымат кызматынан маркумдун жакындары арыз жазуудан баш тартканын билдиришти.