Алдамчылыкка шектелип кармалган "Элиза үй буюмдарынын" өкүлдөрү үй камагына чыгарылды

27-июлда "Элиза үй буюмдарынын" өкүлдөрү алдамчылыкка шектелип кармалганы маалымдалган. Шектүүлөр, тагыраагы 24 жаштагы Элиза Бактыбек кызы жана анын 27 жаштагы жолдошу үй камагына чыгарылды. Бул тууралуу SUPER.KG порталына Свердлов райондук ички иштер башкармалыгынын маалымат кызматынан билдиришти.

Маалыматка ылайык, кечээ, 5-августта алардын баш коргоо чарасы каралып, үй камагына чыгаруу чечими кабыл алынган.

Эске салсак, буга чейин Свердлов райондук ички иштер башкармалыгына М.М. аттуу жаран арыз менен кайрылып, Э. аттуу аял алдамчылык жолу менен анын ишенимине кирип, "Элиза үй буюмдары" тобундагы абоненттик номерлердин акчасын көбөйтүп берүүнү айтып, акча каражатын алганын жазган. Ошондой эле "Элиза үй буюмдарынын" өкүлдөрү каржы пирамидасынын уюштуруучулары болуп саналганы белгилүү болгон.

Бул факты Кылмыштардын жана жоруктардын бирдиктүү реестрине катталып, тергөө иштери жүргүзүлүп баштаган.

Андан бери "Элиза үй буюмдарынын" өкүлдөрүнүн тарапташтары митингге чыгып, Элиза Бактыбек кызы кош бойлуу экендигин жана 1 жарым жаштагы баласы кароосуз калганын айтып, бошотууну талап кылып чыгышкан.