"Келе жаткан Олимпиадада ишеничиңиздерди актайм". Айпери Медет кызы кыргыз элине кайрылуу жасады

"Токио-2020" жайкы Олимпиада оюндарында эркин күрөш боюнча өлкө намысын коргоп, жарым финалга чейин жеткен балбан кызыбыз Айпери Медет кызы социалдык тармактагы баракчасы аркылуу кыргыз элине кайрылуу жасады. Анда балбан кыз Олимпиададан байгелүү орунга жетише албай калганы үчүн кечирим сураган.

"Урматтуу кыргыз элим, тилекке каршы, Токио шаарында болуп өткөн жайкы Олимпиада оюндарында сиздерге жакшы маанай тартуулай албай калдым. Сиздерге терең ыраазычылык билдирем. Мага болгон колдооңуздар дем-күч берүүдө. Буюрса, келе жаткан 2024-жылдагы Олимпиада оюндарында сиздердин ишеничиңиздерди толук актайм деген үмүттөмүн", - деп жазып калтырган спортчу кыз.

Белгилей кетсек, "Токио-2020" Олимпиадасында Айпери Медет кызы алгачкы беттешинде коңшу казакстандык Элмира Сыздыкова менен килемге чыгып, атаандашын 6:1 эсебинде жеңип алган.

Андан соң чейрек финалда күчтүү делинген орусиялык Наталья Воробьева менен кез келип, 12:0 эсебинде жеңишти камсыздап, жарым финалга чыккан.

Жарым финалда Америка Кошмо Штаттарынын өкүлү Аделин Грейге каршы туруп, тилекке каршы 3:2 эсеп айырмачылыгы менен жеңилүү ызасын тартып калган.

Ал эми коло байге үчүн болгон беттеште түркиялык Ясемин Адар аттуу спортчу кыз менен кез келип, тилекке каршы, таза жеңиш менен атаандашына утулуп калган.

Муну менен мекендешибиз Токио Олимпиадасында 5-орунду камсыз кылган.

Эске салсак, Айпери Медет кызы 2017-жылы Финляндияда өткөн Дүйнө чемпиондугунда алтын медалдын жеңүүчүсү. 2020-жылы Индияда өткөн Азия чемпиондугунда күмүш медаль, 2020-жылы Сербияда өткөн Дүйнө Кубогунда коло медалдын ээси. Мындан тышкары бир канча эл аралык мелдештерде байгелүү орундардын жеңүүчүсү.