Сүйүктүүсү колун сураган Толгонай Арзыкеева: "Макул" деп эле туруп калдым, күтүүсүз болду"

Ырчы, актриса Толгонай Арзыкееванын сүйүктүүсү Нурсултан Төлепберген колун сурады. Жүрөк толкуткан видео менен Кыргыз Республикасынын Эмгек сиңирген артисти Мирбек Атабеков социалдык тармактагы баракчасы аркылуу бөлүштү.

Толгонай Арзыкееваны куттуктап байланышканыбызда толкунданган ырчы буларга токтолду.

"Мен Ысык-Көлдө жүргөм. Режиссёр Радик Эшимов менен жубайы жарнамалык съёмка бар деп чакырышкан. Көлдөн Бишкекке келип, съёмка боло турган жерге бардым. Барсам режиссёр, оператор жүрүптүр. Көйнөктөрдү да даярдап коюшуптур. Эч нерсе байкалган жок. Эки, үч кадрдан кийин эле электр жарыгы өчүрүлүп экрандан клип көрсөтүлдү. Андан кийин колумду сурады, жигитимдин достору куттуктап жатышты. Мен "макул, макул" деп эле туруп калдым. Чынында күтүүсүз болду. Эч кимге айта элекмин", - дейт ал.

Ал эми ырчынын үй-бүлөсү кубанычтуу кабарды уга элек. Бул туурасында Толгонай Арзыкееванын апасы менен сүйлөшкөнүбүздө белгилүү болду.

"Биз Таластабыз. Кызым эки күн мурда Бишкекке кеткен. Жигити колун сураганын кызымдын өзүнөн расмий уга элекпиз. Анын тандоосун сыйлайбыз, 3 жылдан бери сүйлөшүп жүрүшөт. Толгонай 23 жашка чыкты, турмушка чыгууга эң ыңгайлуу мезгили", - деди апасы.