Аслан Сартбаев сурак бергенден кийин коё берилди

Улуттук коопсуздук мамлекеттик комитети тарабынан "расалык, этникалык, улуттук, диний же аймактар аралык кастыкты козутуу (жек көрүү)" беренеси менен "Азия Ньюс" гезитинин башкы редактору Аслан Сартбаевге карата сотко чейинки өндүрүш иши башталган. Ал кечээ, 9-августта сурак бергенден кийин коё берилгенин аталган комитеттин басма сөз кызматынан кабарлашты.

Эске салсак, 6-августта социалдык тармакта Бишкек шаарынын мэринин милдетин аткаруучу Таалайбек Сарыбашовго карата "Бул итибайдын "ошский ромашкалары" кимге керек? Ушуну кантип чыдап угуп отурушат" деген постун жазган. Көпчүлүк интернет колдонуучулар муну трайбализм катары мүнөздөгөн, ал эми калаа башчысынын кеңешчиси талкуу жараткан пост боюнча УКМК сөзсүз түрдө чара көрүшү керектигин билдирген.

7-августта Улуттук коопсуздук мамлекеттик комитетинен "расалык, этникалык, улуттук, диний же аймактар аралык кастыкты козутуу (жек көрүү)" беренеси менен "Азия Ньюс" гезитинин башкы редактору Аслан Сартбаевге карата сотко чейинки өндүрүш иши башталганын кабарлашты. Аталган мекемеден Сартбаев интернетке жарыялаган материалда аймактар аралык кастыкты козутуунун белгилери бар экендиги боюнча тиешелүү экспертиза дайындалганын кошумчалашкан. Андан кийин редактор кармалышы боюнча социалдык тармакка билдирүү калтырып, кечирим сураган.