"Орусиядагы кыргыз мигранттарынын саны кыскарсын". Владимир Жириновский Кыргыз өлкөсүнүн Орусиядагы элчилигинин алдына митингге чыкты

Орусиялык саясатчы Владимир Жириновский Кыргыз өлкөсүнүн Орусиядагы элчилигинин астында нааразычылык акциясын өткөрдү. Бул тууралуу Жириновский өзүнүн телеграм каналына жазып калтырды.

"Бүгүн биз Кыргыз өлкөсүнүн элчилигинин жанында бул өлкөдө орустарды басмырлоо окуяларына байланыштуу нааразычылык акциясын өткөрүп жатабыз. Кечээ эле Бишкекте бир кыргыз орус тилдүү кассир аялга кол салды. Андан бир жума мурун кыргыздар орус жигитти шылдыңдашкан. Орустар Кыргыз өлкөсүндө конок эмес. Кылымдар бою орустар көбүнчө өздөрүнө зыян келтирип, Борбор Азиянын өнүгүшү үчүн иш алып барып келишкен. Бүгүнкү күндө да жүз миңдеген кыргыз үй-бүлөлөрү Орусияда иштеп, тапкан кирешеси менен жашап жатышат", - деп жазды Жириновский.

Мындан тышкары ал Орусиядагы кыргыз мигранттарынын санын кыскартып, экономикалык байланышты солгундатууну талап кылган.

Эске салсак, Бишкекте балдар паркында сатуучу кызды калькулятор менен башка чаап жиберген видео тараган. Октябрь райондук милициясынан билдиргендей, окуя 2-август күнү Горький жана 7-Апрель көчөлөрүнүн кесилишиндеги соода борборунда болгон. Арыз жазган кыздын айтымында, ал күнү бейтааныш эркек киши мас болуп алып, аны менен урушуп, сөгүнгөн. Чатакташып жатканда калькулятор менен башка чаап салган.

Бул окуя боюнча Орусиянын Кыргыз өлкөсүндөгү элчиси Николай Удовиченко социалдык тармактагы баракчасы аркылуу оюн билдиргенин жергиликтүү басылмалар жазып чыккан.