Жалал-Абадда эки күндүк рейд учурунда мас абалында унаа башкарган 18 айдоочу аныкталды

Жалал-Абад облусунда өткөн эки күндүк рейд учурунда мас абалында унаа башкарган 18 айдоочу аныкталды. Бул тууралуу облустук жол кыймылынын коопсуздугун камсыздоо бөлүмүнөн билдиришти.

Жалал-Абад облустук жол кыймылынын коопсуздугун камсыз кылуу бөлүмү тарабынан облустун аймагында оор кесепеттер менен коштолгон жол кырсыктарын алдын алуу жана болтурбоо максатында рейддик иш-чара болуп өттү.

Аталган иш-чарада жалпы 442 ар кандай жол эрежелерин бузган фактылар аныкталды. Анын ичинен мас абалында унаа башкаргандыгы үчүн 18 айдоочунун, унааларынын алдыңкы терезелерин караңгылатып алгандыгы үчүн 7 айдоочунун, ал эми буга чейин социалдык тармактарга чыгып кеткен тасмалары аркылуу үлпөт тойлорун коштоп жүрүүдө жол эрежелерин одоно бузган 11 айдоочунун унаалары кармалып, атайын айып короого коюлду.