"Арыктап, мамиле куруу максаты ишке ашпай калган". Англиянын жараны 5 адамды атып өлтүргөн соң өз жанын кыйды

Англиянын Плимут шаарында жергиликтүү тургун 5 адамды атып өлтүргөн соң өз жанын кыйды. Бул тууралуу чет элдик маалымат каражаттары жазып чыгышты.

Ага ылайык, 23 жаштагы Жейк Дейвисон окуя болгон күнү алгач бир үйдүн эшигин сындырып кирип, андагы эне-баланы атып өлтүргөн. Андан соң сейил бакта жүргөн түгөйлөргө ок чыгарган. Анын огунан 5 киши каза болгон, арасында 5 жаштагы кыз да бар. Андан сырткары бир канча адам жаракат алып, ооруканага жеткирилген. Ал эми ок чыгарган Жейк Дейвисон өз жанын кыйган. Алдын ала маалымат боюнча, анын курал алып жүрүүгө уруксат кагазы бар болгон.

Окуя болгонго чейин ал 11 мүнөттүк видео тартып, Youtube каналына жүктөгөн. Анда ал жашоодо көп кыйынчылыктар менен күрөшүп келгенин айтып, арыктап, кыздар менен мамиле куруу аракети эч жыйынтык бербегенине нааразы экендигин билдирген. Ошондой эле ал өзүн Терминатор жана киши өлтүргүч машина деп атаган.

Маалыматта бул иш тергелип жаткандыгы айтылат.