Ооганстандагы абал: Айрым өлкөлөр элчилик кызматтарын токтото баштады

Ооганстанда "Талибан" кыймылынын үстөмдүгү күндөн-күнгө артып жатканына байланыштуу бир катар мамлекеттер аталган өлкөдөгү элчилик кызматтарын жаап, айрымдар кызматташууну кыскартууда. Бул тууралуу чет элдик басылмалар жазышууда.

Маалыматка ылайык, Дания менен Норвегия Ооган өлкөсүндөгү элчилик кызматын белгисиз мөөнөткө чейин толугу менен токтотту. Ал эми Германия, АКШ жана Улуу Британия бийлиги Кабулдагы дипломатиялык кызматташтыгын кыскарткан.

Норвегиянын тышкы иштер министри Ине Эриксен телеканалдардын бирине берген маегинде Кабулдагы элчиликте иш алып барган бардык кызматкерлер жана жарандар Норвегияга эвакуациялана турганын билдирген. Ушундай эле чечимди Даниянын тышкы иштер министри Еппе Куфуд дагы белгилеген.

"Ооганстанда жашаган даниялыктар тез арада өлкөнү таштап чыгып кетүүсүн суранам. Бул өтө олуттуу жагдай", - деп билдирген министр.

Ал эми Франция бийлиги болсо азырынча элчилик кызматташтыкты токтоторун так билдире элек. Коңшу Тажикстан Мазари-Шариф Файзабад жана Бадахшан провинцияларындагы консулдук кызматтарын жапкан.

Белгилей кетсек, АКШ аскерлерин расмий түрдө Ооганстандын аймагынан чыгарып кеткенден бери талиб согушкерлеринин аракети күч алып, өкмөттүк күчтөр менен болгон куралдуу салгылаш токтобой келет.

Акыркы маалыматтарга караганда, талибдер Ооганстандын эң чоң экинчи шаары деп эсептелген Кандагар шаарын толугу менен басып алышкан. Ошондой эле үчүнчү ири калаа деп саналган Герат дагы алардын карамагында.

Жума күнү борбор шаар Кабулдан 50 чакырым гана алыстыкта жайгашкан Пули Алам шаары да аларга багынып бергени кабарланган. Ал эми ага чейин согушкерлер Ооганстандын он ири калаасын - Нимроз, Жаузжан, Сари-Пуль, Кундуз, Тахар, Саманган, Фарах, Баглан жана Бадахшанды багынтышкан.

Маалымат үчүн: "Талибан" кыймылы - Кыргыз өлкөсүнүн аймагында террористтик жана экстремисттик уюм катары таанылган жана ишмердүүлүгүнө тыюу салынган.