"Туугандары билишин каалаган эмес". Москвада кыргыз келин ымыркайын таштандыга ыргытып салып, өзү жумушка кеткен

Орусиянын Москва шаарында тергөөдө жана соттук отурумдарда котормочу болуп иштеген Салтанат Митиева кечээ, 14-августта 41 жаштагы Кыргыз келин баласын төрөп, таштанды салган челекке ыргытып жиберип, кайра жумушка кетип калганын SUPER.KG порталына айтып берди.

"Мен 3 тилде тергөөдө жана соттук отурумдарда котормочу болуп иштейм. Кечээ дагы тергөөчү телефон чалып калды. Кыргыз келин экенин укканда эле жетип бардым. Барсам 1979-жылы туулган келин өзү көчөгө төрөп, жерде жаткан жаман курткага кызын ороп, бөтөлкөсү менен жаткан баштыкка салып, жанындагы таштанды челекке ыргытып коюп, жумушуна кирип кетиптир. Орус аял көрүп калып, милицияга кабар берген. Окуяны укканда нес болдум.

Келинди суракка алганда ал 6 баланын энеси болуп чыкты. 5 баласы биринчи турмушунан алтынчы жана кечээ төрөгөн кызы экинчи турмушунан экен. Москвада 2001-жылы туулган кызы менен иштеп жүрүптүр. Жолдошу менен 3 ай мурун таарыныша кетип, ал Кыргыз өлкөсүнө кетип калыптыр. Эмнеге таштадың десек, "туугандарым билишин каалаган жокмун" деп койду.

Кызы ыйлап келди. Бирок ал апасы боюнда бар экенин билбептир. Ал азыр ыйлап бир тууганын багып алайын деп жатат. Бирок энеде эч кандай сезим жок. Ал азыр убактылуу кармоо жайында. Эртең баш коргоо чарасы каралат. Кыз тирүү, ооруканага алып кетишиптир, андан ары балдар үйүнө берилсе керек. Балким, карап көрүп аялдын кызына береттир.

Мурдагы күнү дагы 26 жаштагы Кыргыз кыз баласын баштыкка салып отургучка таштап кеткен. Бирок ал ары жактан ыйлап, карап турган. Бирөө жарым алып кетсе экен деп. Бүгүн тергөөдөн сурасам ал дагы камакта дейт.

Кызын өзүм багып алайын деп жаткам. Документтерди чогултуп жүрөм", - деди котормочу.