"Айрымдар жандан кечип". Кабулдун аэропортунда учакка жармашкан жарандардын жерге кулап жаткан видеосу тарады

Интернет тармактарында Кабул аэропортунда асманга көтөрүлгөн учактан жерге кулап түшүп жаткан адамдардын видеосу жайылууда. Видеодон жер тилкесинен кыйла бийиктикке көтөрүлүп калган учакка жармашып кетип бара жаткан адамдардын жерге кулап жатканын көрүүгө болот.

Буга чейин өлкөдөн чыгып кетүү максатында Кабулдун аэропортуна жык-жыйма толгон оогандыктар арасында башаламандык жаралып жатканы маалымдалган. Аэропоттогу ызы-чуулар айрыкча өлкөдөн бир гана элчилер менен элчиликте иштеген чет элдик жана жергиликтүү кызматкерлер гана учуп кете алары тууралуу билдирүүлөр тарагандан кийин күч алган.

Жергиликтүү басылмалардын берген маалыматына караганда оогандыктарды алып кетүү үчүн келген коммерциялык учактар жүргүнчүлөргө толуп калып, учууга кооптуулук жаралгандыктан айрым жүргүнчүлөрдү каттамдан алууга мажбур болушкан. Бирок учактан орун ала албай калган жарандар тобокелчиликке барып, жерден көтөрүлүү үчүн күүлөнүп бара жаткан учактын алдынан чуркап чыгып жатышканы айтылган.

Аларды учуу-конуу тилкесинен алыстатуу үчүн аскер кызматкерлери асманга ок чыгарууга мажбур болуп жатышканы да кабарланып жаткан.

Маалымат үчүн: "Талибан" кыймылы - Кыргыз өлкөсүнүн аймагында террористтик жана экстремисттик уюм катары таанылган жана ишмердүүлүгүнө тыюу салынган.