Талибдер Ооганстандагы аймактардын биринде коронавируска каршы эмдөөгө тыюу салганы айтылды

Ооганстанга толук көзөмөл орноткон "Талибан" кыймылы өлкөнүн чыгышындагы Пактия провинциясынын жашоочуларына коронавируска каршы эмдөө алууга тыюу салганы белгилүү болду. Бул тууралуу жергиликтүү телеканалдар жарыялаганын чет элдик басылмалар жазып чыгышты.

Маалыматка караганда, Пактия провинциясынын Саламаттыкты сактоо департаментинин жетекчиси Валаят Хан Ахмадзай талибдер аталган аймакты басып алган соң, вируска каршы эмдөө бөлүмдөрүнүн жабылышын талап кылган.

"Андан бери 3 күн өттү. Эмдөө бөлүмдөрү ачылбай турат", - деп билдирген жетекчи.

Талибдер ошондой эле бардык медицина кызматкерлерине коронавируска каршы эмдөөнү токтотуу боюнча эскертүүлөрдү берген.

Эске салсак, жекшембиде "Талибан" кыймылы Ооганстандын борбору Кабул шаарын басып кирип, өлкөгө толугу менен көзөмөл орнотконун жар салган. Ал эми өлкө башчысы Ашраф Гани президенттик кызматынан баш тартып, чет жакка качып кеткени маалым болгон.

Маалымат үчүн: "Талибан" кыймылы - Кыргыз өлкөсүнүн аймагында террористтик жана экстремисттик уюм катары таанылган жана ишмердүүлүгүнө тыюу салынган.