"Мал кайтарган эмгек акымды мал менен баалашкан...". Ысык-Көлдө эне менен баланын өлүмүнө шектелген жарандын иши сотко өттү

Ысык-Көл облусунда эне менен баланын өлүмүнө шектелген жарандын иши сотко өтүп каралып жатат. Бул тууралуу Ысык-Көл облустук сотунун басма сөз кызматынан билдиришти.

"23-августта дагы соттук отурум болот. Өкүм качан чыгары белгисиз", - деди басма сөз кызматынан.

Ушул жылдын 1-февраль күнү кечки саат 20:00 чамасында Кашат айылындагы турак үйдөн 1967-жылы туулган И.Ж. аттуу аялдын жана анын 1992-жылы туулган уулу И.К.нын жансыз денелери табылган. Бул окуя Ысык-Көл РИИБинде Кылмыштардын жана жоруктардын бирдиктүү реестрине катталып, сотко чейинки өндүрүш башталган.

Шектүү издөө иштеринин натыйжасында, Бишкек шаарынан кармалган. "Шектүү каза болгон эне менен баланын малын бакчу. Тактап айтканда, алардын малчысы болуп иштеп келген. Ортодо ызы-чуу мал боюнча чыккан. Буга чейин дагы шектүү алардын малын багып жүрүп, өзүнүн эмгек акысы катары бир жылкыны сатып жиберген. Бирок ага эне-бала макул болбой милицияга арыз жазып, баланы соттотуп жиберишкен. Жазасын өтөп келгенден кийин кайрадан алардын малын багып жүргөн. Уруш шектүүнүн эмгек акысын малга баалап бергенден улам чыккан", - деп айтып берген.