Германия Өзбекстандын жардамы менен жарандарын Ооганстандан эвакуациялоодо

Германия Ооганстандагы жарандарын Өзбекстандын жардамы менен өлкөсүнө алып кетүүдө. Бул тууралуу чет элдик маалымат булактарында жарыяланды.

"Ташкент аэропорту 18-августта 100дөн ашык Германиянын жарандарын алып келе жаткан А400М согуштук-транспорттук учагын кабыл алды. Бул жарандарды эвакуациялоочу алгачкы каттам эмес. Бүгүнкү күнгө чейин бардыгы 260 жаран Ооганстандан Ташкентке алып келинди. Эми алар Германияга учуп кетишет", - деп билдиришкен Германиянын Өзбекстандагы элчилигинен.

Буга чейин, 17-августта Ташкенттен барган Германиянын согуштук учагы Кабул аэропортундагы баш аламандыктан улам болгону 7 гана жаранын алып келүүгө жетишкени айтылган.

Ошондой эле Ооганстандан Германиянын жарандарын эвакуациялоо боюнча кызматташуулар эки өлкөнүн президенттеринин телефон аркылуу сүйлөшүүсүндө макулдашылганы кабарланган.