"Жамандын артынан жаман келип бир жыл депрессияда болдум, эми жашоону башынан баштайм" дейт Асел Кадырбекова

Ырчы Асел Кадырбекова депрессиядан чыкканын социалдык тармактагы баракчасы аркылуу айтып чыкты. Ал жамандыктын артынан жамандык жанашып келгенин айтып, "өзүңдү колго алып, иште, алаксы, жандан" деп коюңуздар" деген.

"Чындыгында бир жыл катуу депрессияда жүргөнүмдү моюнга алам. Бирок бирөөлөр ушинтип айтса чырдап, "жок, менде баары жакшы деп" моюнга алчу эмесмин. Башыма жамандын артынан жаман жанашып келди.

Биринчиси, кырсык жашоомду түп ордунан бери өзгөрттү. Бул тагдыр, качып кутула албайт экенсиң. Аман калганыма шүгүр айтам. Экинчиси, убактымды, эмгегимди жумшап ачкан салонум да жабылды. Эң өкүнүчтүүсү апамдын жаңы машина алам деген акчасын салонго жумшаганбыз. Буюрса, иштеп мындан да көп табабыз деп. Тилекке каршы, ишке ашпай калды. Эне экен "мейли аман болсок табабыз" деп көз жумуп койду. Үчүнчүсү, менин жеке жашоом.

Мейли, аман болсок баары болот. Эң чоң байлык - өмүр жана ден соолук экен. Калганын кайра башынан баштоого туура келсе да кылса болот. Аман бололу. Эми көп кайгырбай жашоону баштайлы. Айтып бугумду чыгарып албасам баш ооруйт. Көп нерсени ичиме сактай албайм", - деген ырчы билдирүүсүндө.

Ырчы кабылган жол кырсыгынын чоо-жайы:

2020-жылы 26-июнда Бишкектеги Медеров жана Тыныстанов көчөлөрүнүн кесилишинде Toyota Camry менен Honda Odyssey автоунаалары кагылышкан. Анын кесепетинен Toyota Camry унаасында рулда бараткан Асел Кадырбекова катуу жаракат алган.

Ал эми Honda Odyssey унаасынын айдоочусуна кылмыш иши козголуп, убактылуу бир айга камакка алынган. Кийинчерээк Асел Кадырбекованын үй-бүлөсү жол кырсыгына күнөөлүү айдоочуну кечиргени, тосмо арыз жазганы маалымдалган. Иш өндүрүштөн кыскартылган.