"Каргалардын айынан". Казакстанда аким айылдагы жарыктын өчүп жаткан күтүүсүз себебин айтып шылдыңга калды (видео)

Коңшу Казакстандын Актөбө облусуна караштуу Тамды айылындагы жарыктын өчүшүнүн себебин айткан район акиминин видеосу учурда кызуу талкууга алынууда. Анын видеосу социалдык тармактарга тарады.

Аким Рауан Аскаровдун айтымында, айылда электр жарыгы каргалардын айынан өчүп жатат. Журналист менен акимдин диалогу төмөнкүчө болгон:

- Трансформаторго карга конуп анан күйүп, чыңалуу берип жатат. Жарык ошондон өчүүдө.

- Карга? Алакандай болгон куш?

- Ал учат, канаттары темирге тиет.

- Балким, карга трансформаторго жакындабаш үчүн тосуу керек.

- Тосулган.

- Эми бул маселени кантип чечсе болот?

- Мен бул маселени кантип чечүүнү билбейм.

Акимдин бул жообу көпчүлүк интернет колдонуучуларынын кыжырын келтирсе, айрымдары акимди тамашага салып, шылдыңдашкан. Айрымдары буга чейин бийликтин мындай көзөмөлүнө көнүп калганын белгилешкен.