"Баасы 2 миллион сомдон ашык". Баткенде аткезчилик жол менен ташылып бара жаткан жүккө бөгөт коюлду

Баткен облусунун Лейлек районунун аймагында мыйзамсыз өтүп бара жаткан контрабандалык жүккө бөгөт коюлду. Бул тууралуу УКМКнын чек ара кызматынан билдиришти.

Маалыматка ылайык, кечээ, 23-август күнү Лейлектен чек ара кызматкерлери УКМК жана ИИМдин кызматкерлери менен биргеликте аткезчилик жолу менен өтүп бара жаткан жүккө бөгөт коюшту.

"Чек ара кызматкерлери кызмат өтөп жатканда Мерседес-Бенц спринтер үлгүсүндөгү унааны токтотуп текшерүүгө алышкан. Унаанын айдоочусу жана жүргүнчүсү экөө тең 27 жашта жана Кыргыз жарандары экени белгилүү болду. Текшерүүдө унаада тийиштүү документтери жок 175 коробка дары-дармектер бар экени аныкталган. Алдын ала маалыматка ылайык, кармалган жүктүн баасы 2 миллион 680 миң 600 сомду түзөт", - деп билдиришти чек ара кызматынан.

Керектүү протоколдор толтурулгандан кийин кармалган жарандар менен жүктөр тийиштүү органдарга тергөө иштери үчүн өткөрүлүп берилгени кошумчаланды.