Чүйдөгү 9 адамдын өмүрүн алган жол кырсыгы. Айдоочунун артында 5 баласы калды

Чүй облусунун Суусамыр өрөөнүндө катталган үрөй учурган жол кырсыктан Honda Stepwgn унаасында бара жаткан 8 жүргүнчү жана айдоочу окуя болгон жерде жан берген. Үрөй учурган жол кырсыгынан Токтогул районунун Кызыл-Өзгөрүш айылынын 6 тургуну көз жумганы кабарланган. Кызыл-Өргөрүш айылынын тургуну Назарбек Космосбек уулу аталаш тууганы, Honda Stepwgn унаасынын айдоочусу К.С. тууралуу маалымат берди.

"Агам 1983-жылы туулган. Сегиз бир туугандын экинчиси эле. 4 жылдан бери Токтогулдун Кызыл-Өзгөрүш айылынан Бишкекке жүргүнчү ташып иштеп жаткан. Андан сырткары жумуштар чыгып калса иштеп калчу. Үч уул, эки кызы бар. Балдарынын улуусу 7-класста окуса, кичүүсү эми эле басып калды. Өзү айылдаштарын, туугандарын бириктирген айылдагы алдыңкы кишилерден болчу. Кырсык боюнча так эч нерсе айталбайм. Үйдөн чыгарда уктап эле чыккан. Ага чейин телефон аркылуу байланышып жатканбыз. Жол кырсыгына кабылат деп такыр ойлогон эмеспиз", - деди аталаш тууганы.