Түркияда блогер TikTok тиркемесине видео тартып жатып каза болду (видео)

Кубра Доган аттуу түркиялык блогер TikTok тиркемесине видео тартуу учурунда каза болду. Бул тууралуу чет элдик басылмалар жазып чыгышты.

Маалыматка ылайык, блогер TikTok видеосун тартуу үчүн аталаш сиңдиси Хелен менен үйдүн чатырына чыгышкан. Алар күндүн батып бара жатканын чагылдырмак болушкан. Видеону тартуу учурунда Доган кокусунан начар орнотулган чатырга чыгып алып, 50 метр бийиктиктен кулап кеткен. Кыз алган оор жаракатынан улам "Тез жардам" кызматы келгенге чейин көз жумган.

Каза болгон блогердин агасы Неби Доган чатырды орноткон жооптуу уюмду сотко берерин билдирген. Ошондой эле компания жоопко тартылмайынча ишти жөн койбоорун кошумчалаган.

Эскерте кетсек, буга чейин индиялык 20 жаштагы жигит TikTok тиркемесине видео тартуу үчүн сальто жасоого аракет кылып, моюну менен жыгылган жана омурткасына залал келтирген. Дарыгерлер анын өмүрү үчүн сегиз күн күрөшүшкөн, бирок жигит каза болгон.