Ырчы Толгонай Арзыкеева: "Ак тойду өткөрүп алып Америкага кетебиз"

Ырчы, актриса Толгонай Арзыкеевага сөйкө салуу каадасы кечээ, 25-августта болду. Анда ырчы менен анын сүйүктүүсү Нурсултан Төлепберген нике күбөлүгүн алышты. Сөйкө салуу жөрөлгөсү тар чөйрөдө белгиленип, борбордогу эс алуу комплекстердин биринде орун алды.

"Сөйкө салуу жакындарыбыздын курчоосунда болду. Бири-бири менен таанышып, көңүл ачышып, жакшы маанайда отурушту, аларды көрүп мен сүйүндүм. Болочоктогу кайненем менен тааныштым, аябай жакты. Баары "болочок кайненеңе окшош экенсиң, келечекте ошону тартсаң баары жакшы болот" деп айтышты.

Үлпөт той жакында эмес, азырынча документтерим даяр боло элек. Документтерим даяр болгондон кийин кыз узатуу, үлпөт тойду өткөрүп алып Америкага кетебиз", - дейт ал.

Толгонай Арзыкеева чет өлкөгө кетсе дагы чыгармачылыгын уланта берерин, ар кандай тасмаларда роль жаратууга сунуштар түшкөнүн кошумчалады.

Буга чейин Толгонай Арзыкееванын жигити колун сурап, бриллиант шакек таккан. Ал эми бир күн мурда Толгонайга болочоктогу кайын журту сөйкө салып, андан соң жаштар нике күбөлүгүн алышып, нике шакегин тагынышты.